Gipuzkoako Odol Emaileen Elkarteak odol emaileak omentzen ditu urtero, azken urteetan, diploma eta intsignia banaketak herriz herri eginez. Ostiral iluntzean egin zuten ekitaldia Berastegiko udaletxean. Berastegin odola ematen duten lau bizilagunek jaso zituzten oroigarriak: Aloña Erasok urrezko intsignia jaso zuen 40 aldiz odola emateagatik, eta Julene Arejula, Inaxio Apezetxea eta Amaia Azkuek zilarrezko intsignia jaso zuten, 25 aldiz emateagatik. Marixol Atxukarro eta Lurdes Otegi antolatzaileen eskutik jaso zituzten oroigarriak.
Uxue Arzallus zinegotziak eskerrak eman zizkien odol emaileei «borondatez eta musu truk egiten dieten ekarpenagatik eta pertsona askori emandako laguntzagatik». Berastegin urtean hiru aldiz etortzen dira Gipuzkoako Odol Emaileek Elkartekoak donazioak egitera. Horrelaxe jarrai dezatela eskatu zieten emaileei. Ondoren, guztiak batera mokadu bat egitera joan ziren Ategi ostatura.