Txakolin dastatzearekin hasi dute eguna gaur, eta ondoren txapel tiraketa txapelketa egin dute. Atzokoan jende asko elkartu zela esan du Urepele elkarteko Garazi Otxandorena kideak. Izan ere, Urepele elkarteak du Gazte Festak antolatzeko ardura. "Azken bi urteetan ezin izan ditugu Gazte Festak ospatu eta aurten ahal zen guztia antolatzeko gogoz geunden. Ekitaldi gehienak gaur izango dira eta herri bazkarirako 138 pertsona elkartuko gara", esan du. Jende asko dabilela esan du gazteak eta badirudiela jendea gogoz zegoela: "Jende asko dabil, jendea gogoz zegoen, inauterietan ere ikusi genuen". Eguna bukatzeko Muxutruk erromeria taldea izango dute frontoian, eta zahagi ardoa eta bingoa eta gero, DJ Txokoren musikarekin bukatuko dituzte jaiak.