Berastegiko Udaleko Gazteria sailak haurrentzat udaleku irekiak antolatu ditu aurten ere. Iaz bezala, pandemia dela eta, egoerara egokitutako zerbitzua eskainiko da, Goizak Lagunartean ekimenaren bidez. Horretarako, hezitzaileen lan poltsa osatu nahi du udalak. Zerbitzua ekainaren 21ean hasi eta uztailaren 30ean amaituko da, eta lan kontratua edota ordezkapenak egin beharreko egun zehatzetan egingo direla azaldu dute.
Hezitzaileen lan poltsarako izena eman nahi duenak derrigorrez 18 urte baino gehiago izan beharko ditu eta euskaraz jakin beharko du. Berastegin erroldatuta egotea ere lehenetsiko da. Honako baldintzak ere kontuan hartuko dituzte: hezkuntza munduari lotutako ikasketak izan edo egiten aritzea eta udalekuetan hezitzaile bezala eskarmentua izatea.
Egin beharreko lanak honakoak izango dira: Goizak Lagunartean zerbitzuaren planifikazioa, garapena eta ebaluazioa egitea, eta ondoren, programa gazteria dinamizatzailearekin batera garatu beharko du.
Izena ekainaren 9a baino lehen eman beharko da udal bulegoetan, edota gaztedia@berastegi.eus helbidera idatzita.