Berastegitik Tolosarako bidean, plazako sarreratik gertu, errepide ertzeko eremu batean espaloia egiten hasi dira. "Bizilagunek eskaera luzatu ziguten, eta gu ere jakitun ginen hor zegoen arriskuaz", esan du Amaia Azkue Berastegiko alkateak.
Berastegi eta Tolosa lotzen dituen errepide nagusiaren ondoan, etxebizitza asko daude errepideari itsatsita. Horietako bat da Modestoenea etxea, plazatik gertuen dagoena. Hiru familia bizi dira bertan, eta etxetik herrigunera iristeko, orain arte ez zegoen errepide nagusitik joan beste aukerarik. Orain, «irisgarritasuna hobetzeko», espaloia jarriko dute beste espaloi zatia hasten den lekura arte.
Dagoeneko hasi dira lanak egiten. 37.000 euro inguru bideratu ditu udalak lan horiek egiteko, eta bost aste inguruko lanak izango direla aurreikusi du Azkuek. Bien bitartean, errepide nagusian, semaforoak jarri dituzte bi noranzkoetan.
"Errepidea estutu gabe egingo da espaloia, hau da, errepideari erantsita zeuden lurren jabeekin lagapen hitzarmena sinatu dugu, eta eremu horretan egingo da espaloia", azaldu du Azkuek. Errepidea eta ondoko lur eremuaren artean, ordea, desnibel handia dago, eta eskoilera bat egingo dute altuera eman eta errepidearen altu eran espaloia egiteko.
Sasoi eraikuntzak SL enpresa ari da obra lanak egiten. Azkuek azaldu duenez, 40.000 euro baino gutxiagoko lanak zirenez, ez dago lehiaketa irekia egin beharrik. "Jaso ditugun hiru aurrekontuen artean, Sasoi enpresarena zen egokiena".
Berastegi eta Tolosa lotzen dituen errepide nagusiaren ertzean egingo dute espaloia, etxebizitzetako irisgarritasuna hobetzeko asmoz.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!