Animalien zaindaria da San Anton. Gaur, bere egunean, izen bereko ermitan ospakizuna egin dute Berastegin. 10:00etan egin dute meza, eta jarraian, herritarrek eraman dituzten animaliak bedeinkatu ditu Xabier Iturrioz apaizak. Besteak beste, txerrikume batek eta hiru txakurrek jaso dute bedeinkapena. Hala ere, ermitaren ondoko belazean zebiltzan asto zein behiek ere jaso dituzte ur tantak. Bedeinkapena jasota, urte guztirako osasuna banatzen zaie.
Horren ostean, hamaiketakoa egin dute ermita barruan. Urte bukaeran obrak egin dituzte ermita berritzeko eta herritarrek gaur izan dute lan horiek ikusteko aukera. Meza garaian egin duten eske berezia obra lanak ordaintzeko erabiliko dute, eta igandeko meza nagusiko eskea ere gauza bera ordaintzeko erabiliko dute. Pintxo eta edari artean, goiz ederra pasa dute bertaratu direnek.