Lau hilabete iraungo duten lanak gaur 22:00etan hasiko dira, Gipuzkoako Foru Aldunditik jakinarazi dutenez. Horren ondorioz, 48 orduz A-15 errepidea itxita egongo da; gaur 22:00etatik igandeko 22:00etara. Andoaingo noranzkoan, Berastegiko lotunetik aurrera egingo dute mozketa. Iruñeko noranzkoan, Sorabillako lotunea itxiko dute. Erabiltzaileek beste ibilbide batzuk hartu beharko dituzte:
- Ibilbide luzeetarako Nafarroatik Gipuzkoarantz, gomendatutako ibilbidea N-1 errepidea izango da, Altsasuraino lehenik eta ondoren A-10 autobiatik Irurtzuneraino.
- Inguruko herrietakoek, besteak beste, Berastegi, Elduain edo Berrobikoek, A-15 errepideko Berastegiko lotunean bira egin beharko dute, GI-2130 errepidea hartuz, hau da, Tolosa-Leitzako errepidea.
- Lizartza zeharkatzen duen GI-2135 errepidetik ere ibilgailuak bideratuko dituzte, Lekunberrirako noranzkoan.