Mirari Saizar Kultura zinegotziak azaldu duenez aurreko asteburuaren balorazio «ona» egiten dute. Pintxo potea eta Xendarineko ahizpen kontzertua izan ziren ekitaldirik jendetsuenak. Mus txapelketan 14 bikotek parte hartu zuten; irabazleak Xabier Egialde eta Juan Luis Zubiria izan ziren.
Kultur astearen bigarren txanpari atzo ekin zioten Beñat Doyharzabal eta Maitane Garmendia ibartarren Biziabentura Hegoamerikan ikusentzunezkoarekin.
Gaur, berriz, haurrentzako jolasak, Jakoba Errekondoren hitzaldia eta Xalbadorri buruzko dokumentala izango dituzte. Saizarren esanetan, «apustu nabarmena» Errekondoren bisita izan da, liburu berria aurkeztuko du. Lehen ere izan da Berastegin, eta beti «sekulako arrakasta» izan du «bai herritarren artean eta baita inguruko herrietakoen artean ere». Larunbatean Urepele elkartetik jasotako ideia bat gauzatuko dute, ogia egiteko tailerra. Eta iluntzean Eresargi abesbatza.
Azoka eguna
Igandea, azoka izango dute, eta Saizarrek dioen moduan jendeak «gehien estimatzen» duen eguna da. Herriko «baserritar, artzain eta gaztagileek euren burua erakusteko» aukera izaten dute, eta «sekulako indarrez eta gogoz» prestatzen dituzte euren postuak. Herritarrei «bultzada bat» emateko aukera bezala ikusten dute. Hortaz, postuak jartzen dituztenentzat eta ikustera joaten direnentzat «zita berezia» da.
Goizean «25 postutik gora» izango dira pilotalekuan; baita animalien eta argazki rallyko argazkien erakusketa ere. Azokarekin batera lehiaketa ezberdinak ere izango dituzte. Tartean XXIV. Gazta Lehiaketa. «12-13 gazta inguru» lehiatu izan dira azken urteetan. «Sekulako zifra» dela uste du Saizarrek, eta horregatik hori ere bultzatzen jarraitzeko asmoa dute. Gainera, «ikusmin handia» sortzen du. Bestelako lehiaketetan ere herritarren parte hartzea «gora» doa urtez urte.
Kultur astea
BIHAR, URRIAK 31
16:15etik aurrera. Industria parkea Kulkiren eskutik, eskola atarian. Tartean txokolate jatea.
18:30. Bizi baratzea liburuaren aurkezpena Jakoba Errekondoren eskutik, erabilera anitzeko gelan.
22:00. Xalbador, izana eta izena dokumentala, erabilera anitzeko gelan.
URRIAK 31, LARUNBATA
10:30. Ogia egiten ikasteko tailerra, Egoitz Iñurrita eta Olatz Etxeberriaren eskutik, Urepele biltokian.
19:00. Eskola Gurutziaga abesbatzaren emanaldia, erabilera anitzeko gelan.
AZAROAK 1, IGANDEA
Goizean. XVII. Azoka eguna izango da eta bertan herriko produktuak: barazkiak, gozokiak, gazta, eztia, eskulanak, etab.
13:30. Lehiaketa guztietako sari-banaketa.
18:00. Talo jana eta goizeko lehiaketetako gazta eta arroz-esneen dastaketa; ardoak eta sagardoak lagunduta. Tartean, Teresa eta Sara Caminos trikitilariak.