Tradizioari jarraiki, San Anton egunez animaliak bedeinkatzen dira, eurentzat osasuna eskatuz. Ez da, baina, herri askotan mantentzen den tradizioa, eta Berastegi da gorderik duten Euskal Herriko herri bakarretakoa. Bada, urtero moduan, berastegiarrak euren animaliak hartuta San Anton baselizara igo dira. 20-30 pertsona inguru izan dira elizkizunean, eta bitartean animaliak baselizaren kanpoaldean zeuden zain. Batik bat zakurrak eraman dituzte, eta tartean, kanario bat ere ikus zitekeen.
Elizkizuna bukatzean, Xabier Iturrioz apaiz alegiarraren inguruan jarri dira herritarrak, eta ur bedeinkatua bota die animaliei, eurentzat osasuna eskatuz. Ondoren, jatekoa eta edatekoa banatu dute bertaratu direnen artean.