Belauntzan izango da zer ikusi igandean. Izan ere, Belauntzako Udalak artisau eta ganadu azoka antolatu du, 10:30etatik 14:00ak bitarte. Bertan, herriko zein inguruko artisau eta ekoizleek parte hartuko dute, denetariko produktuak eskainiz. Guztira, 20 postu izango dira elizako aterpearen bueltan; baina eguraldi txarra eginez gero, pilotakuan jarriko dituzte postuak. Horiez gainera, herriko baserritarrek abereen erakusketa jarriko dute plazaren bueltan; besteak beste, ahuntzak, ardiak, astoak, behorrak eta behiak izango dira.
Azoka amaituta, bazkaria egingo dute 14:00etan, herriko ostatuan. Herri bazkarira joateko interesa duten herritarrek tiketak erosi beharko dituzte, eta horiek ostatuan izango dituzte salgai.
Koldo Izagirre eta Joseba Tapiaren emanaldia
Eguna borobiltzeko, 18:30etan, Koldo Izagirre eta Joseba Tapiaren emanaldia izango da elizan. Belauntzako Udalak antolatu duen euskal kultura indartzeko helburuz osatutako egitarauaren barruan egingo dute emanaldia. Bederatzi abestiz osatutako Mister Eleizegi izeneko diskoa aurkeztuko dute. Izagirreren testuek eta Tapiaren musikak umorea, ironiaren zantzuak, erlijioaren presioa, gorputzaren arrarotzea eta bakardadea uztartzen dituzte, euskal literatura eta musika garaikidea gustuko dutenentzako pieza nabarmena bihurtuz. Tiketak aurretik erosi beharko dira, eta horiek ere ostatuan izango dira salgai.