Belauntzako Udala azken hilabeteetan haur eta gazteentzako ekitaldiak antolatzen ari da, eta urte honetan ere horri eutsi nahi diola esan dute. Hori dela eta, sormen tailerra antolatu dute, sei eta hamabi urte arteko gaztetxoentzat.
Eskulanak egingo dituzte tailer horietan eta astean behin elkartuko dira: ostiraletan, 18:00etatik 19:30era. Urtarrilaren 27an izango da lehen saioa eta martxoaren 31 bitartean iraungo du. Zorione Mendez Martin izango da irakaslea eta kultur etxea izango da tailerra egiteko erabiliko duten gunea. Denera bederatzi saio izango dira, eta 15 euroko kostua izango du.
Izena udaletxean eman beharko da, urtarrilaren 20a baino lehen. Ikastaroa aurrera ateratzeko gutxienez bost gaztek eman beharko dute izena.