Kirola bultzatzeko asmoarekin hainbat proiektu abiatu dituzte Belauntzan, eta horietako bat izan da bolatoki berria. Aldai baserriko zelaian eraiki berri dute, eta Belauntzako hirugarren bolatokia da. Lehena Benta jatetxe parean zegoela gogoratu du Ramon Lopetegi herritarrak: "San Joanetan bakarrik ibiltzen ginen, baina bertan taberna zegoenez, tarteka hainbat ardo jokatu eta hor egiten genituen tiradak".
Mimo handiz eraiki duten proiektua izan dela azaldu du Lopetegik. Izan ere, eskualdean estalita dagoen lehen bolatokia da Belauntzakoa, eta hori garrantzitsua da txapelketa federatuak jokatu ahal izateko. Horregatik, "Segurako eta Idiazabaleko hainbat aditu etorri ziren pista txukun eraikitzera".
Gauzak honela, bolatoki berriak ez ezik, herriko futbol zelaiak eta frontoiak ere etorkizun berria izango dutela aipatu du Iñaki Telleria alkateak: "Kirolaren inguruan talde-lana bultzatzeko asmoa dugu, egun herrian ditugun baliabide berriak probestuz eta gure herriari bizia emanez".