Azken urteetan egin bezala, urriko azken igandean, Azoka Eguna ospatzen ari dira belauntzarrak. Goizean zehar azokako postuak izan dira frontoian; abereek, berriz, herriko plaza hartu dute. Arratsalderako, ekintza ugari antolatu dituzte; beraz, goizean hurbiltzerik izan ez duenak, badu aukera oraindik.
10:30ean eman zaio hasiera azokari; mota guztietako produktuak eskaini dituzte frontoian jarritako postuetan: arropa, barazkiak, ogia, gozogintzako jakiak, koadroak, eztia... Horiez gain, pintxoak dastatzeko aukera izan da, bertan jarritako barra batean. Bestalde, goizean zehar, Belauntzako baserrietako abereen erakusketa jarri dute plazan.
Postuak eguerdian kendu dituzte, baina festak jarraitu egingo du. 17:30ean, Minimaliaren eskutik, mahaiko jokoak izango dira adin tarte guztientzat. Ondoren, 18:30ean, The Funes Troup konpainiak zirku ikuskizuna eskainiko du. Eguna borobiltzeko, mahaiaren bueltan eseriko dira herritarrak, saiheski jana egiteko.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!