Belauntzako frontoian zenbait aldaketa egiten ari dira azken asteetan. Lan ezberdinak egingo dituzte frontoia egokitzeko eta herritarren beharretara egokitzeko.
Mariano Lazkanok azaldu bezala lan hau garrantzitsua izango da herriarentzat «bai kirol mailan edo bai otordu mailan» antolatu nahi izan diren hainbat kontu «atzera bota» izan dituztelako eguraldi txarragatik. Frontoiari «probetxua» ateratzeko asmoz, ixtea irtenbide egokia izan zitekeela pentsatu zuten duela bi urte.
Orain plan horiek orain gauzatzen hasi dira. Lehenik eta behin isurtze hodiak aldatu dituzte, eta orain ixteko «materialaren zain» daude, baina «egun batetik bestera» iristea espero dute.
Frontoia ixteak bestelako egin beharrak ere ekarri dizkio udalari : «Larrialdietarako ateak eta irteerak behar den bezala egin behar zirela esan ziguten».
Lanekin abenduaren hasieran hasi ziren, eta lehenengo fasea «otsailaren azkenerako» amaitzea espero dute.
Aurrera begirako zenbait lan ere badituzte buruan. Bigarren fase batean «harmailak jartzea» da udalaren helburua, nahiz eta oraindik zer nolakoak jarri aztertzen ari diren.
Aipatu bezala, herrian egin daitezkeen gauza asko «giroak laguntzen ez duelako» mugatu egiten dituela uste du Lazkanok, eta «leku on bat jarrita» gauza asko aurrera atera daitezkeela uste du.
Bigarren fasearen amaiera, «sanjoanetan ospatzen diren festetarako» egitea gustatuko litzaioke udalari. Oraindik hori zehaztea zaila dela uste duen arren, «izen pixka bateko pilotarien partida batekin» inauguratzea polita izango litzatekeela uste du Lazkanok.
Gauzak honela, frontoia berritzea izango da Belauntzako Udalak 2016an izango duen proiektu nagusia, aurrekontuetako zati handi bat hartuko duelako.