Ez da nolanahiko eliza Belauntzakoa. 2009an zaharberritze lanak hasi zituztenean, Zehazten ikerketa enpresakoak deitu zituzten han topa zitezkeen ondare arkeologikoak aztertzeko. Eta sei urteotan, altxor artistiko eta historiko ugari topatu dituzte bertan. Atzo plakaren bistaratzean Belauntzan ziren Xabier Balerdi eta Iosu Etxezarraga arkeologoen esanetan, Gipuzkoako aztarnategi arkeologiko esanguratsuenetarikoa da.
Izan ere, XVI. mendeko elizaren eraikinaren oinarrietan indusketetan zebiltzala, XIII. mendeko elizaren arrastoak topatu zituzten lehendabizi: abiside erromaniko bat. Eta hura aztertzen murgilduta zeudela, ustekabeko aurkikuntza batekin egin zuten topo: XI. mendeko harrizko aldarearekin. "Eliza zurezkoa izango zen garai hartan, baina aldarea agertu da", azaldu dio Atariari Xabier Balerdi arkeologoak. Hain justu, egungo aldarearen tokian dago duela mila urteko aldarea. Gainera, toki berean erromatarren garaiko aztarnak ere topatu dituzte; pareta baten aztarnak, hain justu. Aurkikuntza horren arabera, duela bi mila urtetik giza asentamenduak daude Belauntzan.