Urteroko ohitura jarraituz Txekor jatea egin dute gaur Baliarrainen. Elosegiko txekorra, herrikoa bertakoa dastatu ahal izan dute bertaratu direnek; 180 kiloko pieza, gauerditik kozinatzen aritu direna. 170 lagun inguru bertaratu dira herriko frontoira herri bazkarian parte hartzeko.
Goizean umeentzako herri-kirol jolasak eginez abiatu dute eguna eta eguerdi aldera bildu dira plazara Unai Izagirre Attola eta Aritz Garmendia trikitilariak. 14:00etarako zuten hitzordua baliarraindarrek frontoian: txorixo egosia, txekorra entsaladarekin eta Larretako arroz esnea, kafea eta kopa izan dituzte bazkaltzeko.
Gauerdian jarri dute txekorra erretzen eta 12 ordu baino gehiago eman ditu sutan. Dozena bat lagun aritu dira bi orduko txandatan haragia gainbegiratzen eta ordu erdiro eman diote buelta. 14:00etarako prest izan dute. Beste 15 bat laguneko taldea aritu da mahaiak zerbitzatzen.
Auzolanean antolatu dute gaurko eguna Baliarraindarrek, azkeneko 27 urteetan bezala. «Jendeak etortzen jarraitzen duen bitartean guk segiko dugu txekorra prestatzen», esan du antolaketan aritu den herritarretako batek.
Karretilkada bat produkturen zozketa egingo dute bazkalostean eta, arratsaldea girotzeko, trikitilarien bigarren saioaz gozatuko dute baliarraindarrek.
