Larunbatean, urriaren 19an, ospatuko dute Gazte Eune Baliarrainen. Hirugarren aldiz ospatuko dute eta egun osorako jarduerak antolatu dituzte.
Ugaitz Garmendia Baliarraingo alkatearen hitzetan hori da «berritasun nagusia». Orain arte ostiral iluntze batean egiten zuten ospakizuna eta aurten, berriz, larunbatera eta «egun osora» egin dute apustu. Garmendiak azaldu duenez, «herritar guztientzat» zabaltzea izan dute asmo: «Beste urteetan guraso eta haurrak pixka bat lekuz kanpo sentitzera irits zitezkeen, gazte asko elkartzen ginelako eta iluntzean zirelako jarduera guztiak».
Oraingoan, berriz, goizetik hasiko dute egitaraua mendi ibilaldiarekin eta, ondoren, hamaiketakoarekin. Baina arratsalderako ere prestatu dute eskaintza: erromeria eta garagardo dastatzea izango dituzte, besteak beste. Afarian, berriz, urtero elkartzen dira helduak eta gazteak eta iragarri dutenez, aurten, dagoeneko saldu dituzte 160 txartel.
Aurrera begira lanean
Aurreko urteetako edizioen ondoren hausnarketa saioak egin eta ondorioztatu dute «zerk funtzionatzen duen» eta «zerk ez». Hori horrela, gaur egun antolatzea «errazagoa» dela nabarmendu du Garmendiak.
Alkateak azaldu du, aurten, hogei bat gazte aritu direla eguna antolatzen eta gogobeteta hitz egin du giroaren inguruan: «Hamalau urte inguruko gazteak ere animatu ditugu parte hartzera. Horrela, etorkizunean, errazagoa egingo zaie taldera gerturatzea». Urtero «balorazio positiboa» egiten dutela ere gehitu du, eta larunbatean gerturatzera «animatu» ditu inguruko herrietako gazteak ere.