Azken boladan eguraldi txarra egin duela eta kexu zen jendea, bada, ez du horrelakorik erakusten Ibiurko urtegiak. Egun euritsuak izanagatik, urtegiak bere edukieraren %76,22 du beteta. Azken bost urteetako zifra txikiena dela jakinarazi du Gipuzkoako Urak agentziak.
Ibiur urtegiak Ikaztegieta, Alegia, Altzo, Tolosa, Ibarra, Belauntza, Irura, Anoeta, Amasa-Villabona, Asteasu, Zizurkil, Hernialde eta Andoain udalerriak hornitzen ditu; denera, 52.000 biztanle. Urtegiak 7.575.197 metro kubikoko edukiera du, beteta dagoenean.
Iazko azarotik aurtengo martxora aurre alertan izan da urtegia. Martxotik maiatzera,berriz, alerta egoera markatu du edukierak. Azken hilabeteetan gora egin du edukierak, nahiz eta une honetan oraindik aurre alertan izan.
Gipuzkoako Urak agentziak esan duenez, edukieraren zifrak momentuko egoera deskribatzen du, ez du pistarik ematen baliabidearen autonomiaz. «Gure aurreikuspenak momentu honetan ditugun edukiera datuen araberakoak dira, eta bataz besteko kontsumoa hartzen dugu kontuan. Momentu honetako datuek erakusten digute, datorren urteko udaberrira arte ur baliabideak izango ditugula», azaldu dute. Ibiurko urtegia aurre alertan egonagatik, egunerokoan ez duela eraginik izango diote. «Hala ere, jarraipena gertutik egiten jarraituko dugu, kontsumo ohitura eta jarduerak ere aztertuz».