Edozein festatan aurretiazko lana beharrezkoa izaten da. Hori honela, Baliarraingo txekor jatean auzolanak ez du hutsik egin: sua eta txekorra bera prestatzea, gainontzeko osagaiak, frontoia atontzea, mahaiak prestatzea, zerbitzatzea... guztia herritarren esku. Honela, festa eguna bihurtu zuten igandekoa Baliarrainen txekorraren bueltan.
Jatekoaz gain, erosteko aukera ere izan zuten bertaratutakoek. Aramako lorezaina gerturatu zen Baliarrainera eta lore azoka muntatu zuen frontoiaren inguruan.
Jan-edan festa batean ezin musika falta eta oraingoan Imanol eta Iñaki trikitilariak arduratu ziren bazkalaurrea eta bazkalostea musika doinuz bustitzen.
Gainera, guraso elkarteak saski ederra zozkatu zuen egunari amaiera emateko.