Giro onak ez du hutsik egin Santamañako festetako azken egunean. Gaurkoan ere trikitilariek girotu dute arratsaldea, baina bertaratu diren gehiengoak gazteen arteko lehia ikustera joan da.
Zortzi parte hartzailez osaturiko bi talde aritu dira lehian. Batetik, Ixkuak izeneko talde gorria; Udai Aranburu, Ibai Izagirre, Oier Izagirre, Auritz Alkorta, Aimar Orbegozo, Mikel Izagirre, Joseba Astiasaran eta Enaitz Agirrezabalak osatuta, Arkaitz Etxarri gidari zutela. Bestetik, Apotikoak izeneko talde berdea; Oier Iturbe, Oibar Olano, Aner Tapia, Lander Sarasua, Axier Usandizaga, Aratz Agirrezabala, Xabier Amonarriz eta Suhar Aranburuk osatuta, Axier Sarasua gidari zutela.
20 minutuko txandan aritu dira bi taldeak, eta bero handia egin duen arren, parte hartzaileek borrokan aritu dira amaiera arte. Azkenean, talde gorrikoek lortu dute garaipena, 59 plaza, zinta bat eta 3 metro eginda. Talde berdekoak, berriz, 53 plaza, zinta bat eta 36 zentimetro egin dituzte.
Lanak amaituta, trikitilarien azken saioarekin jaitsi dute Tranpazulo.
