Aiztondo bailararen eta El Salvadorreko Segundo Montes komunitatearen arteko senidetzea urteroko jai batekin ospatzen dute Asteasuko, Adunako, Amasa-Villabonako eta Zizurkilgo udalek. Aurten, Asteasun egingo dituzte ekitaldiak, larunbatean, maiatzaren 30ean.
Udaletxean egingo diete El Salvadorreko ordezkariei harrera instituzionala 12:00etan. Ondoren, plazan egingo diete herri harrera, eta eguna amaitzeko, elkartasun bazkaria Santamaña elkartean egingo dute.
Ostegunera arte erosi daitezke bazkarirako txartelak Asteasuko kultur etxean, Adunako Txantxanen, Amasa-Villabonako Iratzarren eta Zizurkilgo Iriarte eta Egarri tabernetan. Helduentzat 25 euroko prezioa izango du menuak, eta 14 urtetik beherakoentzat, 10 euro.