Aurki hasiko dira Asteasuko San Pedro festak. Jazarpenik gabeko herri more bat eraikitzeko eta ez festetan, ez beste inoiz erasorik onartuko ez dutela adierazteko argazki jendetsua aterako dute, ostiralean, 19:00etatik aurrera herriko plazan. Asteasuko Udalak, Txosna herrikoiak eta emakume taldeak egin dute argazkirako deia.
«Guretik eta guretzat antolatutako jaiak izatea nahi genuke, baina festa lasaiak eta alaiak izateko ezinbestekoa da elkar errespetatzea. Errespetua eta elkarbizitza osasuntsua dira herri baten ardatz». Kaleak, plaza, taberna eta txosna guztiontzat leku seguruak izatea bermatu nahi dute: «Hori dela eta, umorea eta U-morea jarri ditzagun gure jokaera guztien oinarrian. Ez dugu inolako erasorik onartuko. Ez festetan eta ezta egutegiko beste zeinahi egunetan ere».
Norbera bere jarrera eta jokaeren erantzule izateko deia luzatu dute, «festak guztiontzat izatea, norbere ardura baita». Jazarpenik gabeko herri more bat eraikitzeko, argazki jendetsuan parte hartzera animatu dituzte herritarrak.