Teresa del Valle ikerlari eta antropologo feminista zendu da. Emakumearen eta genero sistemen arloan ekarpen akademiko handia egin du. Asteasuko Udalak «aitzindari, erreferente eta pertsona aparta» bezala definitu du Del Valle: «Gure herriko kaleetan 21 urtez ibili zen, gure herria bihotzean zeramala, eta gaur herri osoak bihotzez agurtzen du».
Del Valle izan zen aitzindarietako bat antropologia feminista Euskal Herrira ekartzen: EHUko Emakumearen Ikerketa Mintegiaren sortzaile eta buruetakoa izana da. «Bere lanik sakonena eta iraunkorrena antropologiaren eta feminismoaren arloan utzi zuen, belaunaldi oso bat inspiratuz eta bide berriak irekiz», esan du Asteasuko Udalak sare sozialetan.
Bihar, ostegunarekin, Asteasun egingo da antropologo eta irakaslearen aldeko hileta elizkizuna, udalak jakinarazi duenez, «haren azken nahia betez». San Pedro elizan, 18:00etan emango diote azken agurra. Doluz eta «harrotasunez» agurtu nahi izan du Asteasuko herriak Del Valle: «Eskerrik asko Teresa, zure ekarpenagatik, zure presentziagatik eta zure maitasunagatik. Beti gure artean izango zara».