Mundu Bat Asteasun egitasmoko Harrera Taldeak jatorri atzerritarreko pertsonei harrera egiteko prozedura landu du. Asteasun 30 nazionalitate ezberdinetako herritarrak bizi dira eta bizilagun berriak erdigunean jarriz, prozedurak arreta jartzen du harrera-gizartearen erantzunkidetasunean, jatorri atzerritarreko pertsonei harrera egiteko Tolosaldeko Esparru Protokoloa erreferentziatzat hartuta.
Harrera-prozedura lantzearekin batera Asteasuko harrera-gida ere egin dute, jatorri atzerritarreko iritziak jasota. Gida euskaraz, gaztelaniaz, arabieraz eta frantsesez dago eskuragarri eta jatorri atzerritarreko pertsona bat Asteasura iritsi eta erroldatzen den unean emango zaio eskura. Gaur aurkeztu dute gida eta ekitaldian hainbat herritarrek hartu du parte. Bozeramale lanak egin dituzte Pili Legarra alkateak eta Ashlyn Simmons Alaskan jaiotako herritarrak.
Asteasun eskura dauden zerbitzuen oinarrizko eta beharrezko informazioa ematen du gidak. Erroldatzea egiteko eman beharreko pausoak, autobus zerbitzuaren inguruko informazioa eta eskola, osasun etxea eta gainerako telefono garrantzitsuak jaso dira bertan. Udalerrira iristerakoan pertsona batek jakin beharreko guztia biltzen du, alegia.
2022an sortu zen Mundu Bat Asteasun egitasmoa, atzerritik datozen herritar berriei harrera komunitarioa antolatzeko eta herrian kultur aniztasunean oinarritutako elkarbizitza sustatzeko. Harrera Taldea osatu dute egitasmoaren barruan eta jatorri atzerritarreko nahiz bertako bizilagunek parte hartzen dute bertan, baita Asteasuko Udaleko arduradun politiko eta teknikoek eta Tolosaldea Garatzeneko Migrazio eta Aniztasun arduradunek. Harrera egiteko prozedurarako Elhuyarren aholkularitza jaso du Harrera Taldeak.
Hurrengo hitzorduak
Mundu bat Asteasun ekimenaren barruan lanean jarraitzen dute eragileek eta datorren apirilaren 5ean bilera ireki bat egingo dute. Kulturarteko Espazioa izena eman diote eta 10:00etan hasita udaletxeko areto nagusian bilduko dira herritarrak. Bi gai lantzeko baliatuko dute bilera: alde batetik, harreraz hausnartzeko tarte bat zabalduko dute, eta horretarako, Mondragon Unibertsitateko Arrakala Ikerketa Taldeko bi kide joango dira; eta bestetik, Mundu Bat Asteasun egitasmoaren jarraipenaren inguruko gogoeta egingo da. Bilera amaitzean Babarrumba musika taldearekin pintxo poteoa ibiliko dira.
Bestalde, maiatzaren 10ean, lehenengo Harrera saioa egingo dute Asteasun. Saio horretan, azken sei hilabeteetan herrira iritsitako jatorri atzerritarreko bizilagun berriei harrera egingo diete. Udalaz gain, herriko eragile eta herritar ezberdinek parte hartuko dute.
Gonbita luzatu diete asteasuarrei hitzordu hauetan parte hartzeko beste nazioetatik datozen pertsonei ez bakarrik harrera instituzionala, harrera komunitarioa ere egin ahal izateko. Kulturartekotasunean oinarritutako elkarbizitza baterako oinarrizkoa dela irizten diote.