Duela urtebete pasatxo abiatu zuen Fibromialgia abordatzen proiektua amaituko du asteburu honetan Beñat Garcia Escribano asteasuarrak. Zailtasun handiko dozena bat kirol probatan parte hartu du 2024ko urtarriletik hona, eta egitasmoari «amaiera gozo» bat emateko, are erronka handiagoa jarri dio bere buruari: Gipuzkoari itzulia korrika ematea.
Ostiralean, martxoaren 21ean, Donostiako Boulevardetik abiatuko da Garcia 20:00etan eta Gipuzkoari itzuli osoa eman ondoren, Asteasuko plazan amaitu asmo du, igandean 12:00ak inguruan. 40 ordu inguru beharko ditu 200 kilometroko bidea egiteko. 8-10 kilometroro jan-edanak egiteko geldialdi laburrak egingo ditu eta 50 kilometroro, berriz, luzeagoak —20 minutu ingurukoak— arropak aldatu eta atseden hartzeko. «Ez dut aurreikusi lo egiteko tarterik, nahiz eta beharra sortzen bazait izango dudan aukera, ordutegia bost orduko marjinarekin prestatu baitugu».
BIDEA ELKARREKIN
Gazte asteasuarrak bakarrik egingo du bidea baina alboan 30 laguneko taldea izango du babesa ematen. Garciak herritarrei dei egin die harekin batera zatiren batean korri egin dezaten eta deialdi berezia egin die eskualdeko herritarrei. Hitzorduak jarri ditu igande goizerako: Ikaztegietan —05:00 - 07:30 artean—, Tolosan —09:00 - 09:30 artean— eta Villabonan —10:30 - 11:00 artean—.
Helburu solidarioa du Gipuzkoako itzuliak, eta zeharkatuko dituen herri guztietara fibromialgiaren ingurukoak zabaltzeaz gain, Garciak ikerketara bideratzeko dirua biltzeko asmoa du, Gofundme.com plataformaren bitartez: «Itzuliak eragingo dituen gastuak material salmentatik eta merkatari eta ostalarien babesarekin estali nahi ditugu, eta kanpainarekin jasotako guztia gaixotasunaren ikerkuntzara bideratu nahi dugu». 5.000 euro biltzeko helburua jarri dute Fibromialgia abordatzen proiektuko bultzatzaileek.
Garciak gaixoengan eta haien ingurukoengan pentsatuta jarri zuen egitasmoa martxan duela urtebete eta haiek izango ditu gogoan erronken segidari amaiera emateko ekitaldian. Hala ere, begiz jota ditu beste proba batzuk eta aurreratu du fibromialgia ikusarazteko borrokak «beste modu batzuetara» jarraituko duela.
