Siemens-Gamesa lantegiak hartutako azken erabakiek kezka eta ezinegona sortu dute Asteasun eta eskualde osoan, bertan aritzen diren langileetako asko herrikoak edo bailarakoak baitira. Egoera honen aurrean Asteasuko Udalak erabaki du Siemens-Gamesako zuzendaritzari bilera eskatzea. «Udalak enpresaren asmoak ezagutu nahi ditu, aurrera begirako asmoak zein dituzten, zein aurreikuspenekin jokatzen duten eta plantari zein etorkizun ikusten dioten».
Langile batzordearekin ere bilduko da udala lan erregulazioaren xehetasunak ezagutzeko eta erregulazio horrek iraun dezakeen urte eta erdiko epealdi horretan udalak egin dezakeenaz langileekin hitz egiteko. Egoerak asko kezkatzen dituela esan du Pili Legarra alkateak: «Oraingoa baino sasoi oparoagoak ezagutu ditu Siemens-Gamesak eta ez da samurra familia askoren euskarri ekonomikoa den iturria egoera ezegonkor batean ikustea». Hala ere, esperantzarako leihoa ere zabaldu du alkateak eta esan du baikortasun puntu bat eragiten diola lan erregulazioaren gainean lortu den akordioak.