Asteasuko Udalak eskerrak eman dizkie San Pedro festak aurrera ateratzeko beraien ekarpena egin duten herritar, eragile eta elkarte guztiei. «Lehendik ere bagenekien baina beste behin erakutsi da auzolanaren garrantzia. Jai parte hartzaileak nahi baditugu denon artean sortu behar ditugu», esan dute udal ordezkariek.
Jaiak giro onean igaro dituztela aipatu dute udaletik, egitarau oparoaz gozatu ahal izan dutela: kirol probak, musika eta dantza, besteak beste. Udalak esan du esker berezia zor diela gazteei, «izugarrizko» lana egin baitute txosnarekin. «Antolakuntza ezin hobea eduki du».
Erasoen aurkako protokoloari dagokionez, herritarrek adierazi duten borondate ona nabarmendu dute udal ordezkariek eta horrekin «pozik» daudela esan dute. «Erasorik ez da salatu baina lanean jarraituko dugu guztiokin eta guztiontzako jaiak antolatzen jarraitzeko. Herriko eragileen arteko sareak indartu eta Asteasu herri bizia izateko».