Bertsolari aldizkariak hirugarren bertso paper lehiaketa antolatu du aurten. Hamalau urte artekoen eta hamalau urtetik aurrerakoen kategoriak bereizi dituzte eta dagoeneko sarien berri eman dute. Beñat Zeberio asteasuarrak lortu du nagusien mailan bigarren saria Twitter zendu zenekoa sortagatik.
Iñaki Murua, Ekaitz Goikoetxea eta Eli Pagolak osatu dute epaimahaia eta banatu dituzte sariak kategoriaz kategoria. Scaperoom-erako sarrerak, kanpineko egonaldiak eta bazkariak oparituko dituzte saridunen artean. Zeberiok Elkano scaperoom-erako bi sarrera eta Itziarko hostalean bi lagunentzako bazkari irabazi ditu. Parte hartzaile guztiek Imanol Lazkanoren Aho bizarrik gabe liburua oparituko zaie.
SARIAK
Gaztetxoak
- Lehen saria: Nora Arrizabalaga Arrieta, Azkoitia, 12 urte. Agur amatxo!
- Bigarren saria: Ane Peña Carrasco, Azkoitia, 12 urte. Euskara.
Helduak
- Lehen saria: Aitor Tatiegi Loidi, 22 urte, Oñati. Desentxufa nazazu.
- Bigarren saria: Beñat Zeberio Mateos, 18 urte, Asteasu. Twitter zendu zenekoa.
Irabazleen bertsoak neguko Bertsolari aldizkariaren alean argitaratuko dira. Hau da Beñat Zeberioren Twitter zendu zenekoa sorta:
Dirua duenarentzat
zein erraz dena biltzea
eta edozer gauza nahi
duen bezala deitzea.
Horrenbeste aurkako aburu!
Muskek hizki bakarraz lortu du
mundua erdibitzea.
Ta kontra eginez Laboari,
Elonek lortu du txoriari
hegoak ebakitzea.
Txoriak ehizatzen hasi
nahi zuen Muskek gustora,
baina udazkena arte
ez zeukan sobran denbora.
Bi makil elkar gurutzatuta,
horietako bat lodituta.
Zaila da azaltzeko, ba,
nola pasa den, zoritxarrean,
txoritikan urrats bakarrean
guardia zibilen logora.
Nahiz jendea banatuta
egon, erasotzailea
sarri bihurtu daiteke
bi herriren ehailea.
Askok egin du deia uzteko
txiolaritza, ez babesteko
txioaren hiltzailea.
Mila esker salbatzeagatik
hainbeste jende pantailetatik,
oh Elon salbatzailea!