Gasteizen ospatu den artearen arloko fantasiaren nazioarteko Tartalo jaialdiaren lehenengo edizioan ohorezko saria eman diote Bernardo Atxaga idazleari. Jaialdiaren amaierako hitzaldia eman zuen igandean asteasuarrak.
60 kultur ekintza baino gehiago eta 100 artista izan dira protagonista Tartalo jaialdian. Zorroztasun akademikoa eta ezagutza zientifikoaren zabalkundea uztartzea izan da ekimen honen helburua. Arte adierazpen ugari izan dira azaroaren 6tik 12ra, besteak beste, erakusketak, film laburren maratoiak, tailerrak, mahai-inguruak, liburuen aurkezpenak, hitzaldiak, rol jokoak eta cosplay lehiaketak egin dira.
Euskal Herriko Unibertsitateko letren fakultatean, Montehermoso kulturunean, Ignacio Aldecoa kultur etxean eta Artium museoan gauzatu dira ekimenak, eta Atxagarekin batera, besteak beste, Paul Urkijo eta Kepa Sojo zinemagileak eta Josemi Beltran kultur kudeatzaileak hartu dute parte.