- Gazteen maila-lehen saria
- Beñat Zeberio Mateos (Asteasu, 2005)
- Doinua: Bakardadeak (Jon Martin)
1.
Nahiz agian zuk ez uste,
pertsona batzuen grinek
diotezen hitz arinek
gehiago pisatzen dute.
Nahiz haiek sakatu mute,
egingo diete, klaro,
haiei jaramon gehiago.
Zergatik entzuten bide
dira_haien xuxurlak nire
oihuak baino_ozenago?
2.
Nahiz katez lotua libre
den nire_ahots oparoa,
hitzero estutzen doa
ta oihu guztiak nire
ahots korden amilbide,
eztarriaren kaltea;
ezin askatu katea.
Dena handia den mundu
honetan hain zaila dugu
infrasoinu izatea.
3.
Nire_ahotsaren joera
ezin da erraz aldatu:
belarri batetik sartu
eta bestetik atera.
Ta deus hobetze aldera
in ezin dezakedala,
umeldu zait betazala.
Gor mundu batean legez,
oihukatu dut "mesedez,
norbaitek entzun nazala!"
4.
Begiratuz albotara,
nabaritu ditut di-da
bi begi niri begira
ta, magnetismoa traba,
ezin nire begirada
bi begi haietatik ken.
Begi haiek bazekiten
ni nola_utzi hitzik gabe,
ixiltasunaren jabe,
hitzik gabe hitz egiten.
5.
Eta inpaktu zuzenez
zidan azala zulatu
eta bihotzean sartu.
Bere begiratu emez
aski jarraitzen zuenez
nire bihotza betetzen,
jarraitu zuen gailentzen
bion hitz egin ezinak,
sentimendu_haren uhinak
deuseztatu ez zitezen.
6.
Ahoan ze paralisi!
Lehenengo momentutik
argi utzi dit zergatik,
behintzat hala dut iritzi,
ez nintzen inoiz iritsi
inorekin oraindaino
hitzak erabiltzeraino:
begiradaz argiago
transmititzea baitago
hitzak erabiliz baino.
7.
Irribarre bat pausatu
zitzaigun ezpain ertzetan,
uzkurdurak masailetan
hala baitzuen kausatu.
Indarren batek bultzatu
ninduen aurrea_hartzera.
Zaila da azaltzen, zera,
ni zerk bultzatu ninduen
biok babesten gintuen
isiltasuna haustera.
8.
Eta "gustatzen zatzaizkit"
esan nion maiteminez,
malkoak eutsi ezinez,
baiezkoaren aurretik.
Bolumen kontuengatik
ez gara ibiltzen larri,
antzina_egin gisa sarri;
bi infrasoinuren talka,
belarrira xuxurlaka
mintzatzen gara elkarri.