Autoa uzteko eta hamaiketakoa egiteko txoko guztiak lepo bete dira Santamañan. Ermita barruan ere mahaiak jarri behar izan dituzte. Kanpoan, trikitilarien doinu alaiak entzuten ziren. Ondoren, Peñagarikano eta Irazu bertsolarien txanda izan da. Hauek sortutako barre artean itzuli dira trikitilariak oholtzara. Bertsolariak ere dantzan jarri dituzte.
Herri kiroletan Asteasuko gazteen arteko desafioa ikusi da. Harri jasotzen, lokotx biltzen, zaku lasterketan eta korrika ibili dira. Berdinketarekin amaitu denez lehia, sokatiran erabaki nahi zuten irabazlea. Baina ez da posible izan, hemen ere tiraldi bana irabazita geratu baitira.
