Gabirondo urnietarrak sasoiko dagoela erakutsi du goizean Asteasuko Bulano baserriko lurretan izandako lehian. Ohiko eran izan da txapelketa, hau da, ordubetean zeinek belar kilo gehiago moztu. Gabirondok 5.108 kilo moztu ditu.
"Jokin hasieratik indartsu hasiko zela banekien, beraz, berari eusten saiatu naiz lehen hiru sail moztu arte. Berak behera egin duela uste dut, eta nik erritmoari eutsi diot abantaila gehiago atera arte", azaldu du Gabirondok. Azken saila erdizka utzi badu ere, eroso eta gustura aritu dela adierazi du.
Atzetik izan du gaurko lehian faborito zen Jokin Etxeberria amasarra, 4.643 kilo moztuta. Oier Urkola anoetarrak 3.749 kilo moztu ditu eta Mikel Lizartza tolosarrak, berriz, 3.419 kilo.