Asteasuko EAJ alderdi politikoko kideek Aitziber Egaña Callejo izendatu dute alkatetzarako hautagai maiatzaren 28ko udal hauteskundeetarako. Biologia Zientzietan lizentziatua da Nafarroako Unibertsitatean, eta gaur egun Administrazio Publikoan ari da lanean.
Zerrendaburuak aurreratu duenez, EAJ-rentzat «berebizikoa da elkarbizitza politikoa, soziala, ingurumenekoa, kulturala eta genero-berdintasunekoa lortzen laguntzen jarraitzea». «Asteasu bazterketarik gabeko udalerri izatea da nire helburu nagusia; denentzat atseginagoa eta bizikideagoa. Asteasu, guztiontzat herria izatea nahi dut», gaineratu du.
Horrez gain, aurreikusi dituen lan-ildoen artean, Asteasu «auzo guztietako herritarren kohesiorako eta garapen ekonomiko, hezitzaile, sozial eta kulturalerako aukera berrien iturri» izatea nahi duela nabarmendu du. Horretarako, «ingurumenean eta pertsona ahulenen gizarte-babesean arreta berezia» jarriko duela agindu du.