Kirol saio pertsonalak

Segituan, ordea, bere proiektu pertsonalari bidea egitea erabaki zuen: Aiztondo bailarako herritarrei entrenamendu pertsonalen zerbitzua eskaintzea. Geroztik, kirol errendimendua hobetzeko indar entrenamenduak egiten baditu ere, osasuna hobetzea helburu duen jendearekin aritzen da gehien.

Bere proiektuari forma emateko helburuarekin, Asteasun edo inguruan kokatuko den kirol gune bat irekitzeko asmoa du Segurolak. Izan ere, entrenamendu pertsonalak ez ezik, talde murriztutako entrenamenduak, crosstraining eta entrenamendu funtzionalak ere prestatu ohi izan ditu, eta «horretarako leku zabal eta prestatu bat izan behar da». Azken hau adin eta baldintza fisiko guztietara egokituta dagoen entrenamendua dela azaldu du entrenatzaileak: «Gorputzaren pisuarekin zein material ezberdinekin modu dinamiko batean egindako ariketez osatutako saioak izaten dira. Bakoitzak bere gaitasunera egokitutako intentsitatea izanik». Entrenamendu bakoitza bezero bakoitzaren behar eta nahietara egokitzen saiatzen da. «Gaztea bada edo errendimendu handia baldin badu, erresistentzia handiko entrenamendua prestatuko diot. Pertsona heldua baldin bada, lesio bat baldin badu edo muga batzuk baditu, entrenamendu pertsonalizatua antolatuko diot».

Gainera, gaur egun, indar entrenamenduek geroz eta garrantzi handiagoa hartzen ari direla azpimarratu du Segurolak: «Gazteok askotan estetika bilatzen dugu. Baina ez dugu ahaztu behar indar entrenamendua beharrezkoa dela osasuntsu mantentzeko, batez ere 30 urtetik aurrera masa muskularra galtzen hasten garelako. Lehen behintzat kontzientzi oso gutxi zegoen indar entrenamendua beharrezkoa zela, masa muskularra ez galtzeko edo egunerokotasunean mugikortasun arazorik ez edukitzeko. Adin heldu batera iristen garenean, 60 urtetara, adibidez, ez da berandu indar entrenamendu hori lantzeko. Beharraren arabera pertsonalizatu egin behar da, hori bakarrik».