Santamañako ermitaren kanpaia ere jo dute festen hasiera ofizialean, eta goiz osoan zehar ere joka aritu dira, haurrak zein helduak. Hasiera ofizialaren aurretik, haurrek globoak margotu dituzte, euren aurpegiak jarriz, eta orrietan Tranpazuloren marrazkia egin dute. Gero, ermitaren horma batetik zintzilikatu dituzte, dekorazio moduan.
Haurrak ere ederki aritu dira jolasean, urez betetako globoak jaurtikiz. Bero egiten zuen eguerdian Santamañan eta inork ez zuen bustitzeko beldur handirik. Bazkariarekin eman diote jarraipena egitarauari. 80 pertsona inguru elkartu dira paella jateko. Arratsaldean eta gauean, Ostolaza eta Rakel Pujana trikitilariek girotuko dute festa.