Asteasuko jaiak 2022

Berreskuratu zutenei aitortza

Gaurkoa festetako egun handia da Asteasun, San Pedro eguna; hiru urteren ondoren berriz egin dute dantza-soka, eta dantzari gazteek opari ederra egin diete helduei.

Asteasuarrak gogoz ari dira ospatzen festetako egun handia. San Pedro elizako meza nagusia amaitu ondoren, Alkate soinua jo dute txistulariek, eta Pili Legarra alkateak eta udaletxeko zinegotziek ohiko ibilbidea egin dute. Ondoren, dantza-sokaren txanda heldu da. 2019an egin zuten azken aldiz, eta aurten, ohiturari jarraituz, dozena bat dantzari elkartu dira eliza atarian, txistulariek lagunduta, bertaratu diren herritarren aurrean dantzatzeko. Aurreskuaren eta atzeskuaren aginduetara, desafioa, azeri-dantza, fandangoa, arin-arina eta kalejira dantzatu dituzte. Azken hiru dantzetan, gainera, asteasuar gehiagoren laguntza izan dute.

Une hunkigarriena, ordea, agurra dantzatzerako orduan heldu da. Haritz Mujika eta Izaro Garmendia dantzariek, ikusleen artera sartu, eta bere garaian dantza-soka berreskuratu zuen herritar bat atera dute plazara. Gero, gauza bera egin dute dantza-sokan zeuden beste hiru kiderekin, baita txistulariekin atabala jotzen ari zenarekin ere; hauek ere ohitura berreskuratu zutenetakoak dira. Horrela, agurra herritar bati dantzatu ordez, talde bati dantzatu diete, eta aurreskuak eta atzeskuak soilik egin ordez, gainerako dantzari guztiek ere egin dute, dantzari gazteek helduei, alegia. Agurra dantzatzeaz gain, zapi bat oparitu diete, egindako lana eskertzeko.

Erlazionatuak

San Pedro egunean, dantza-soka Asteasun

Asteasu

Asteasuko San Pedro jaietako dantza-sokan, omenaldia egin diete dantzari gazteek helduenei, behinola dantza hau berreskuratu zuten horiei; agurra e...
"Dantza-soka berreskuratu zutenak omendu nahi izan ditugu"

Asteasu

Asteasuko Jaiek aurrera jarraitzen dute. Gaur goizean, dantza-soka egin dute. Izaro Garmendia eta Jon Olanorekin hitz egin dugu.
"Lehen egunetik nabaritu da jendeak festarako gogo berezia duela"

Asteasu

Pili Legarra Asteasuko alkateak jaien inguruan hitz egin digu. Sei eguneko festak nola hasi dituzten ere aipatu du.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!