Giro ederrean ari dira ospatzen Asteasuko Elizmendi auzoko Santa Krutz jaiak, eta urtero bezala egitarauan herri kirolek bere tartea izan dute. Herritar ugari bildu dira gaurkoan lau kirolariei animo mezuak eskaintzera. Alde batetik, Aratz Mugerza mutrikuarra eta Julen Gabirondo urnietarra aritu dira aizkoran, eta bestetik, Udane Ostolaza eta Aroa Sanchez oriotar eta harri jasotzaileek saio bikaina eskaini dute.
Harri jasotzaileek ekin diote ekitaldiari, eta 80 kiloko harri errektangularra jasotzea izan dute lehen proba. Aizkolarien txanda izan da ondoren, eta enborra azkarren mozte zuenak irabazten zuen proba. Harri jasotzaileek hartu dute txanda berriz. Hirugarren proba honetan antolatzaileek azaldu bezala, batak kubikoarekin eta besteak harri baldarrarekin egin behar izan dituzte jasoaldiak, “ikusleek harri batetik bestera dagoen desberdintasuna ikus zezaten”. Azken proba txanda librean egin dute, hau da, aizkolari eta harri jasotzaileen artean bikoteak egin dituzte. Bikote bakoitzeko aizkolariak egurra moztu ostean, harri jasotzaileak zilindroarekin jasoaldia egin behar izan du.
“Tamaina eta forma desberdinetako harriak ekarri ditugu jendeak ikus zezan neskek harriak jasotzeko nola ikasita dauden. Aizkolariek kasuan berriz, lehen mailakoak ez izan arren, ezin dugu ahaztu Gabirondo Euskal Herriko segalari txapelduna dela eta pentatloian bigarren egindakoa. Aratz Mugerza ere aizkoran eta pentatloietan aspaldian ibilitakoa da. Hortaz, oso kirolari handiak dira”, esan dute.