Landa Eremuko Emakumeen Nazioarteko Eguna ospatuko da urriaren 15ean. Egunaren harira Eusko Jaurlaritzako Ekonomia Garapen, Jasangarritasun eta Ingurumen Sailak online jardunaldi bat antolatu du, landa eremuko emakumeen parte hartze publikoari buruzkoa. Eskainiko diren ponentzien artean Pili Legarra, Asteasuko alkateak Emakumeak toki-korporazioetan hitzaldia eskainiko du.
Legarra Asteasuko alkate izateaz gainera, Basqueskolako talde motorreko kidea da. Ostiraleko hitzaldian bertako toki-korporazioetako emakumeei buruz hitz egingo du eta Basqueskola sarearen esperientzia partekatu eta ikusaraziko du.
Landa eremuko emakumeen parte hartze publikoari buruzko jardunaldia 10:00etan hasiko da, Jone Fernandez Eusko Jaurlaritzako Landaren eta Itsasertzaren Garapeneko eta Europar Politiketako zuzendariaren eskutik. Ondoren Legarrak eskainiko duen hitzaldiaz gainera beste bi izango dira: Errotik Kooperatiba feministak eremu publikoan emakumeen parte hartzeaz emango duena; eta Leire Milikuak eskainiko duena, emakume nekazarien garrantzia eta parte hartzeaz. Ondoren, hizlari horiek eta beste gonbidatu batzuek mahai inguru batean parte hartuko dute, beren iritzia emanez eta beren esperientzia pertsonalean eta profesionalean oinarritutako lekukotasunak partekatuz, eremu publikoan aktiboki parte hartzen duten landa eremuko emakume gisa.
Jardunaldietan parte hartzeko ezinbestekoa da aurretik izena ematea. Izan ere, jardunaldian parte hartzeko esteka posta elektronikoz bidaliko zaie aldez aurretik izena eman dutenei. Hemen eman daiteke izena.