Asteasuko Sanpedroak 2020

Aizkolarien eta harri-jasotzaileen erakustaldi borrokatua

Tolosaldeko Ataria 2020ko eka. 29a, 18:00

Asteasuko San Pedro Jaietan herri kirol jaialdi ikusgarria ospatu da gaur eguerdian. Aizkoran Txikia-k eta eta Mugertzak neurtu dituzte indarrak; harriarekin, Aimar Irigoien eta Urra-k. Udane Ostolazak ere 14 urterekin erakustaldia eskaini du.

Udane Ostolaza gazteak aitaren eta aitonaren bidetik jarraitzen duela erakutsi du gaur Asteasun. Harria dotore jasotzen duela ikusi dute San Pedroetara gerturatu diren guztiek. Alboan, gainera, punta puntako bi harri-jasotzaile izan ditu, elkarren aurkako lehian, Aimar Irigoien eta Mikel Lopetegi Urra.

Udako erakustaldi horietako bat izanagatik, bi herri kirolariek zuten guztia eman dute. Irigoienen orruak horren adierazle izan dira. Parean geratu dira 125 kiloko zilindroarekin. Berdinketarik egon ez zedin, kubikoarekin arauak aldatu dizkie Joxe Anjel Sarasola hizlariak. 10 jasoaldi ea nork eman azkarrago 125 kiloko harriari. Kasu honetan errezildarra nagusitu zaio zarauztarrari.

Aizkoran ere goi mailako ikuskizuna eskaini dute Julen Alberdi Txikiak eta Ugaitz Mugertzak. Enborra nork azkarrago ebaki izan da burutu duten lehen proba. Mugertza II.a izan da azkarrena. Ondoren, zortzi enbor moztu behar izan dituzte. Mutrikuarra hasi da hemen ere aurretik, baina Txikia beti izan du gertu. Azkoitiarrak, Anjel Arrospide laguntzaile zuela, seigarren enborrean hartu du aurrea, eta amaiera arte ez du utzi.

Erlazionatuak

Harri-jasotzaileen erakustaldia Asteasun

Tolosaldeko Ataria 2020 eka 29 Asteasu

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!