Asteasuko Siemens Gamesan txandaka lanean ari diren langileek lehen greba eguna dute gaur

2017an, langileak kaleratzeen aurkako protestan.

Enpresa batzordeak jakinarazi duenez, enpresak "hitzarmena baldintzatu nahi izan du langile batzuen lan baldintzen kontura". Ostegunerako ere greba eguna deitu dute. 

2019ko urtarrilean enpresarekin hitzarmen berria negoziatzen hastean, bi helburu garbi zituen Asteasuko Siemens Gamesako enpresa-batzordeak: "Enplegu bermea eta hitzarmena, hau da, orain arte enpresak sortu dituen langile kolektiboen diskriminazioa eta soldata arrakala txikitzeko bidean hastea".

Batzordetik jakinarazi dutenez, enpresak enpleguaren bermea hitzarmenarekin loturik izan behar duela jakinarazi zien. "Ez hori bakarrik, hitzarmena baldintzatu nahi izan du enpresako langile batzuen lan baldintzen kontura", gaineratu dute.

Hori ikusita, enpresa batzordeak enpresaren proposamenean pisu txikiena zuen kolektiboa deitu zuen asanbladara; txandaka lanean ari direnak edo errelebistak. "Asanbladan honako proposamena egin zen, gaur, martxoak 3, eta ostegunean, martxoak 5ean, greba egunak izatea. Eta enpresarekin adostasunik lortu ezean, martxoak 9tik aurrera greba mugagabean hastea. Asanbladaren emaitzak oso argiak izan ziren. 79 baiezko, 32 ezezko eta 3 zuri".

Ondorioz, Siemens Gamesa Asteasuko erreleboetako langileak greban gaude hitzarmen duin bat eta enplegu bermea lortu arte. Deitzaileek azaldu dutenez, lehenengo egun honetan grebaren jarraipena 100% izan da.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!