Adin guztietako herritarrek nahiz ingurukoek utzi ahal izan dute euren aletxoa elkartasuna adierazteko. Irteera puntuan lehenak, 2010ean eta ondorengo urteetan jaiotakoak izan dira. 500 metroko itzulia eman diote zirkuituari. Enea Garmendia eta Endika Jimenez izan dira azkarrenak. Alebin mailan, berriz, Peru Muxika izan da lehena helmugan.
Ondoren, 2005 eta 2008 urteen artean jaiotakoen txanda izan da, bi kilometroko ibilbidea egin behar izan dutelarik. Kategoria honetan, Ahetze Olanok eta Beñat Fernandezek lortu dute lehen postuan amaitzea. Aurten, ez da itzuli solidariorik izan. Ez da inor animatu, eta haurren lasterketak amaitu ondoren, helduen lasterketari heldu diote zuzenean.
Kadeteek lau kilometroko ibilbidea burutu dute, eta jubenil eta seniorrek, berriz, sei kilometrokoa. Kadeteetan Maialen Alkain eta Axel Arrikarte izan dira garaile. Jubeniletan, Inar Herrero izan da azkarrena mutilen kategorian. Nesketan, berriz, bi garaile izan dira, izan ere, Maddi Urkiolak eta Elene Ceberiok elkarrekin gurutzatu dute helmuga. Senior mailan, berriz, Iñaki Sarasua gizonezkoetan, eta Lourdes Colomo emakumezkoetan izan dira bizkorrenak.
Haurren mailako irabazleei, Mattin dendarako 10 euroko opari txartelak eman dizkiete sari modura; gaztetxoenen kasuan, bonboi kaxa eta gazta bana helduetan, berriz, ardo botila eta gazta bana. Partaide guztientzat, gainera, hamaiketakoa banatu dute eta amaieran, saski desberdinak zozkatu dituzte.