Bernardo Atxaga idazleak (Asteasu, Gipuzkoa, 1951) jasoko du aurtengo Espainiako Letren Sari Nazionala. Epaimahaikoen iritziz, "euskararen eta gazteleraren modernizazioari eta nazioarteko proiekzioari ekarpen funtsezkoa" egin dio Atxagak. "Poesiaz blaitutako narratiba baten bidez" egin du hori idazleak, "zeinetan errealitatea eta fikzioa distiraz konbinatu dituen". 40.000 euroko saria da asteasuarrari eman diotena.
Berriki kaleratu du Atxagak Etxeak eta hilobiak (Pamiela, 2019) nobela. Gaur, gainera, Donostiako Literaktum literatur jaialdiaren barruan hitzaldia eskainiko du, Ernest Lluch kultur etxean, 19:30ean.