Hitzordu estua zetorren, eta azken emaitzak ere hala erakutsi du: Iban Pardo segalari zestoarrak 3.806 kilo ebakita irabazi du txapela. Gabirondo faboritoetako bat bigarren izan da, 3.803,5 kilo ebakita, eta Jokin Etxeberria Bedaion bizi den amasarrak hirugarren postuarekin konformatu behar izan du, 3.765 kilorekin. Laugarren sailkatua Jon Otegi gazte oiartzuarra izan da, 3.502 kilo ebakita.
Paraje bikainak hartu du Euskal Herriko lehia, eta segalarien ordubete lanak argazki ederrak utzi ditu. Denboraldiko hirugarren txapelketako finala izan da gaurkoa, eta ohiko eran jokatu dute lehia: moztutakoa bildu, eta pisatu egin dute.
Julen Gabirondo izan da lanak bukatzen lehena, eta kronoa itzali aurretik amaitu ditu sail guztiak; haren ondotik, Jokin Etxeberriak ere erlojuari aurrea hartu dio. Lanean ziharduten bitartean izan dira txartel eta ohartarazpen zenbait, eta horren eta pisatzeen emaitzen zain geratu dira kirolariak eta publikoa.
Sari banaketaren ondoren, lau segalariek elkarrekin izoztu dute momentua.