Jaialdi hunkigarri eta berezia jaso zuen larunbatean, Donostiako Antzoki Zaharrak. Naizen Arabako, Bizkaiko, Gipuzkoako eta Nafarroako Adingabe Transexualen Gurasoen Elkartea aurkeztu zuten, orain arteko Chrysallis, alegia. «Larunbateko festa mundiala izan zen, ezin dut hitzez deskribatu. Sentimenduz beteriko festa alai eta hunkigarria izan zen» esan du Abi Labaien elkarteko kide asteasuarrak.
2015ean sortu zuten Chrysallis elkartea. Zortzi familia ziren orduan, baina elkartea haziz joan da eta, gaur egun, 100 bat familiak osatzen dute; horrek ere ekarri du elkarte berriaren sorrera. Izan ere, ez da izen aldatze soila; Chrysallis Naizen izango da aurrerantzean eta Espainiako Chrysallis elkartearen adar bat izatetik talde independente izatera pasa da. Erlazioak lantzen jarraituko dute, dena den, baina beste era batean. «Chrysallis Euskal Herria sortu genuenean zortzi familia besterik ez ginen. Nolabait Chrysallis EH estatu mailako Chrysallisen menpe zegoen. Ikusi duguna da, azken urte hauetan zortzi familia izatetik 100 familiatik gora izatera pasatu garela, eta hazten goazela. Zentzu horretan ohartu gara guk nahiko lan badugula EAE eta Nafarroan, gure gobernuekin eta gure legeekin aritzeko. Gure ustez, hemengo lan hori finkatzeko, elkartea hemen finkatu behar genuen, Madrilera begiratu gabe; nahiz eta jarraitzen dugun estatu mailako Chrysallisekin eta beste hainbat elkarterekin lanean. Euskal Herrian bertan badugu nahikoa lan, eta egoki ikusi dugu, gure elkartea, lana eta borroka hemen finkatzea», esan du Labaienek. Astero, gutxienez hiru dei berri jasotzen dituzte; horiek guztiak ez dira elkartera batzen, «baina erakusten du inguruan oraindik badela, laguntza eta informazioa behar duten familia gehiago ere».
Urteotan, elkartearen abaroan, trebakuntza eskaini dute transexualitatearen arloan, eta kanpainak ere egin dituzte gaia gizarteratzeko. Sostengu emozionala ere izan dira hainbat familiarentzat, eta aholkulari jardun dute, alorrean aritu behar duten profesionalentzat.
Naizen izena du elkarte sortu berriak, eta izena Ekaitz Goikoetxeak egindako oparia dela esan du Labaienek: «Poesia bat da. Naizen hitza, hitz asmatu bat da, eta atzean hitz joko bat dago. Goikoetxeak bere momentuan azaldu zigun 'orain naizena' eta 'atzo nintzena'ren arteko hitz joko bat dela. Era berean, haizearen jokoa ere egiten du, haizeak h hizkia eraman izan balu bezala...».