Telebistara egokituko dute Asteasuko harri-jasotzaile txapelketa

Euskal Herriko Harri Handien Txapelketa Asteasun jokatuko da, larunbatean, 22:00etan. Haize berriekin dator aurtengo edizioa, izan ere, telebistarako egokitu dute txapelketa. Ordutegiaz gain, formatua ere desberdina izango da. Orain arte harri-jasotzaileak banaka aritu izan dira, baina hilaren 22an binaka lehiatuko dira. Guztira sei izango direnez, hiru txandatan banatuko dituzte parte hartzaileak.

Sei horietatik eskualdeko ordezkari bakarra Iban Ugartemendia izango da. Hernialdekoarekin batera Jon Unanue Goenatxo III.a, Imanol Illarramendi Kortaberri, Jokin Eizmendi, Aimar Irigoien, Aimar Galarraga eta Julen Diaz ariko dira.

Telebistara egokitu izanak arrazoi nagusi bat dauka: Euskal Herriko Harri-Jasotzaile Txapelketa Euskal Telebistak zuzenean eskainiko du.

Harri-jasotzaile bakoitzak, hiru minutuko lana izango du harri bakoitzarekin. Harriak ondorengoak izango dira: 200 kiloko errektangularra, 175eko zilindroa, 150eko kubikoa eta 100 kiloko bola. Kilo gehien jasotzen dituenak jantziko du txapela.

Hasiera batean Aimar Irigoien Asteasura joatekoa zen. Errezildarrak hamaika txapela irabaziak ditu harri handien txapelketa horretan. Aurten ezingo du Usarrabi pilotalekuan lehian aritu, lesioa medio. Bere lekuan, Jokin Eizmendi izango da faborito nagusia.

Iban Ugartemendiak aurkezpenean esandakoaren arabera, harri-jasotzaileak gogotsu daude proba nola joaten den ikusteko. «Ikusi beharko da gauean eta binaka nola moldatzen gara. Gauza berria da eta uste dugu ondo aterako dela, gauza polita izango da eta ea jendea animatzen den».