2018 urtea hasi zenetik, Asteasuko eraikin eta zerbitzu publikoetako hainbat hiri-altzari hautsi dituzte egile ezezagunek. Leihoak, komunak, ateak… hautsi dituzte, zenbait pintada egitearekin batera. Ez da lapurretarik edota bestelako aldarrikapenik izan; Udalak adierazi duenez, "bandalismo hutsezko ekintzak izan dira, beraz". Apurketa hauek eragindako konpontze eta material kostua 5.000 eurotik gorakoa izango dela jakinarazi dute udal arduradunek.
Isolatutzat har zitezkeen ekintza hauen atzean egile berak egotearen zantzu sendoa du Asteasuko Udalak, hirugarren eraso oldearen ondoren. Orain arte erabaki eta neurri zehatzik hartu ez dituen arren, udalak asteasuar guztiekin partekatu nahi du arazoaren gaineko kezka.