Iazko eguraldi goibelik ez zen, gaur, Asteasuko plazan; eta hori, nabaritu egiten da jendearen aurpegietan. Kuadrilla egun beroa zetorkiela bazekiten asteasuarrek, eta termomentroaren pare jarri dute giroa ere, bazkal aurreko poteoan: bero-bero.
Ibilbide musikatua egin dute herriko musikariekin, eta 2012. urteaz geroztik egiten duten ikurrinaren omenaldia iritsi da, ondoren. Aurten, berrikuntza moduan, giza-katea egin dute plazatik kale nagusian gora, eta ikurrina erraldoia udaletxera ekarriz irudikatu dute aldarria; ohorezko agurraren ondoren, balkoitik zintzilikatu dute oihala.
Eta orduan bai, orduan iritsi da bazkari legea egiteko ordua. Bazirudien karpak eutsi egiten ziola beroari, eta asteasuarren ahal izan dutena baliatu dute, aurpegia freskatzeko. Pozik dira, ordea; arratsalde eta gau luzea dituzte aurretik kuadrillek.