Bigarren urtez jarraian ospatu dute Muskerraren Eguna, Asteasuren eta Obabaren ondare zabala eta anitza ezagutarazteko asmoz. Goizeko 10:00etan abiatu dira bertaratuak plazatik, Bernardo Atxaga lagun zutela, liburuan agertzen den alegiazko lurralde literarioa inspiratu zuen ingurua ezagutzera. Bidean, geldialdiak egin dituzte gauzak kontatu eta esplikatzeko. Ondoren, familia eta haurrek jolasak egin dituzte: muskerraren bila, besteak beste. Eguerdian, mokadua egiteko aukera izan da plazan trikitilariek alaiturik, eta herriko harri-jasotzaileek mahai ingurua egin dute gaztetako istorio eta kontuak kontatuz.
13:00etan, herriko plazako iturriaren bueltan, apustua egin dute. Guztira, sei bikotek hartu dute parte. Iturriari bi lagunen artean 20 buelta eman behar izan dizkiote, batak barrualdetik, eta besteak, kanpoaldetik. Azkarrena egin dutenek irabazi dute: Joseba Txapartegik eta Mikel Alkortak. Bigarren postuan geratu dira Jon Ander Artaza eta Peru Larrañaga.