Kezkatuta dago Asteasuko Udala. "Azken denboran errefusa asko ugaritzeaz gain, ez gara ondo bereizten ari eta bilketa guneak ez dira errespetatzen. Zer dela eta? Zer egingo dugu elkarrekin egoera hori konpontzeko?".
Herritarrek hiri hondakinak kudeatzerakoan antzematen den "motelaldi" horri aurre egiteko, irtenbide bat topatu nahi du Asteasuko Udalak, herritarrekin landuz eta adostuz. Kanpoko lantalde baten laguntzaz, aste honetan eta hurrengoan, bilera desberdinak egingo dira herritar eta eragileekin:
- Maiatzaren 23an, goizez merkatari, ostalari eta kalean dabiltzan herritarren iritziak bilduko dira. Bazkalondoan, berriz, 14:45ean eskolan guraso elkarteko taldearekin landuko da gaia.
- Maiatzaren 30ean, herriko jubilatu taldearekin elkarrizketa izango dute, 16:00etan.
Bilera horietan bildutako guztiarekin, elkarrekin arazoa aztertu eta irtenbideak bilatzeko bilera ireki bat izango da, ekainaren 5ean, udaletxean, 18:30etik 20:30era. Ondorioen arabera, Asteasuko Udalak behar diren neurriak hartuko ditu.