Eguraldiak ez ditu asteasuarrak kikildu, eta jaietako egun potoloenetarikoan bete-betean sartu dira, egitarauari eutsi. 14:00ak aldera, horrela, ikurrinari omenaldia eginez ekin diote kuadrillen egunari: ohorezko agurra dantzatu, eta Asteasuko kuadrilletako ordezkariek zintzilikatu dute, gero, balkoitik: "Beste behin ere aldarrikatuko dugu, gure hauxe dela", azaldu dute.
Eta jarraian iritsi da festa, luzaro itxaron beharrik izan gabe, trikitilarien lehen notekin. Plazan ezarritako karpa minutu gutxian bete da, eta antolatzaileak hasi dira olagarroa mahaietan banatzen. Arratsaldean elektro txaranga izango dute, eta gauean, berriz, bisitari asko erakarriko dituen kontzertua: Su ta Gar.
Bihar amaituko dira aurtengo sanpedroak, sorginaren igoerarekin.