Eguerdian eguzki izpiek gogor jo dute Hernioren magalean. Santamaña ermitaren barrualdean, elkartearen babesean eta zuhaitz azpitan bildu dira herritarrak beroari aurre egin eta festa egun handia ospatzeko.
Meza ondorenean hamaiketakoa egin dute herritarrek eta Iosu Arrizabalaga "Izer" eta Unai Narbaiza aritu dira soinu eta panderoarekin. Bertsotan, berriz, Anjel Mari Peñagarikano eta Jexux Mari Irazu. Halako beroarekin dantzan hasten denari monumentua egin beharko litzaiokeela kantatu dute bertsolariek eta botatako amuari soinua jarri diote trikitilariek: porrusalda, arin-arin eta fandango doinuak ibili dituzte eta ez dute asko behar izan asteasuarrek dantzara ateratzeko. Saio ederra egin dute beroak gehien jotzen zuen unean.
700 kiloko harriarekin desafioa egin zuten asteburuan auzoko gazteek zaharrenen kontra –gazteak atera ziren garaile–. Eta gaur, eguerdian ere herri kiroletan jardun dute bi taldeek elkarren kontra: lokotx-biltzen, trontzan, harri jasotzen, txingoka eta txingan ibili behar izan dute.
Arratsaldean, 17:30ean kalejiran aterako dira auzotarrak eta afal aurretik Tranpazuloren jaitsiera egingo dute. Gauean, Izer eta Narbaiza ariko dira ermita atarian.